Vivimos
inmersos na era dixital, na sociedade da información. Pouco a pouco internet é
parte das nosas vidas cotiás. Andamos con el a todas as partes e non paramos de
mandar datos ao ciberespacio. É innegable que con esta tecnoloxía estase a
modificar o modo de relacionarse cos demais, de comunicarse e de estudar. Coa web
2.0 nace o termo de identidade dixital.
Que
é a identidade dixital?
Na época actual, as tecnoloxías do
procesamento da información e a comunicación, coa aparición da web 2.0, sitúan ao individuo na rede, creando contido, divulgándoo, buscando información,
formando redes de diferentes tipos. Toda esta actividade que se xera con este
comportamento activo vai construíndo unha identidade.
A identidade defínese como o conxunto
de trazos propios dun individuo ou dun grupo de individuos que os caracterizan
fronte aos demais. Esta identidade, no ámbito das novas tecnoloxías, denomínase
identidade
dixital e son os trazos que caracterizan a un individuo ou un
grupo nun contorno tecnolóxico.
A construción
da identidade dixital está relacionada co desenvolvemento de habilidades no manexo
das tecnoloxías da información e a comunicación e cunha actitude activa,
aberta, participativa e colaborativa na rede.
Constrúese
coa achega de textos, imaxes e vídeos a Internet e, nas redes sociais, a través
dun perfil de usuario que se enlaza cos perfís doutros usuarios ou contactos. A
identidade relacionase coa dos demais e percíbese dunha forma subxectiva conformando
unha reputación dixital.
Estas identidades, nuns casos, coinciden coa identidade da persoa na vida
real, noutros casos, non. Recoméndase crear unha identidade dixital homoxénea coa identidade real e ben
xestionada porque repercute nunha vida máis activa en todos os ámbitos e nun
entramado social máis consolidado.
Que
é a identidade dixital profesional?
Unha das maiores
contribucións da web 2.0 é a construción
de canles multidireccionais e hiperconectadas onde os usuarios participan,
interactúan e colaboran. A isto hai que engadir un maior interese polas
redes sociais verticais, especializadas nalgunha materia. Neste ámbito nacen as
redes dixitais profesionais.
Nas redes de
grupos profesionais vaise construíndo unha identidade profesional seria, rigorosa,
en conexión con outras persoas do mesmo sector no que se traballa, coas que se
mantén contacto.
Esta identidade
dixital é a identidade dixital
profesional. É unha forma de obter reputación e valoración profesional, que
pode ter consecuencias laborais, aínda que non é exactamente unha técnica de
busca de emprego. A reputación online
é a opinión ou consideración social que os demais usuarios teñen da nosa contribución
online.
Hai que ter en conta que calquera recrutador ou empregador vai usar
esta fonte de información para saber máis sobre nós, sobre a nosa vida persoal
e profesional. Por este motivo é moi importante coidar a imaxe que proxectamos na
rede e os demais poden ver, pois esta identidade é a que nos define, a nosa
personalidade.
Unha das posibilidades que nos facilita a rede é xestionar a nosa
identidade dixital, coa creación dun perfil homoxéneo, rigoroso, profesional e
contrastado. A este currículo virtual podemos engadirlle evidencias e tamén
amosar opinións doutros profesionais do mesmo sector.
Déixovos un interesante vídeo sobre este tema.
No hay comentarios:
Publicar un comentario